Արցախի 9-րդ «Արմաթ» ինժեներական լաբորատորիան գործում է Նորշենում
29-01-2018
Հունվարի 19-ին՝ Արցախի Նորշեն համայնքի Լեոնիդ Հուրունցի անվան դպրոցում տեղի է ունեցել «Արմաթ» ինժեներական լաբորատորիայի բացման պաշտոնական արարողությունը: Միջոցառմանը մասնակցել են Արցախի կրթության, գիտության և սպորտի նախարար Նարինե Աղաբալյանը, ԱՀ արտաքին գործերի նախարար Մասիս Մայիլյանը, ԻՏՁՄ գործադիր տնօրեն Կարեն Վարդանյանը, ԻՏՁՄ անդամ ընկերությունների ներկայացուցիչներ, ԿԳՍ նախարարության աշխատակիցներ և այլք:
ԻՏՁՄ-ի «Արմաթ» ինժեներական լաբորատորիաների կրթական ցանցը հիմնվել և օրեցօր սահմանները ընդլայնում է 2014 թ-ից և նպատակ ունի անվճար ինժեներական կրթության պայմաններ ապահովել յուրաքանչյուր դպրոցականի համար: Դպրոցականներն «Արմաթ»-ում սովորում են ռոբոտաշինության և ծրագրավորման հիմունքներ, մասնակցում մի շարք խրախուսական մրցույթների, ճամբարների և այլ միջոցառումների, հանդիպում ՏՏ ոլորտի ներկայացուցիչներին և այլն:
10 տարեկանից սկսած ինժեներական մտածելակերպի զարգացումն ու հմտությունների ձեռք բերումը մեծ հեռանկարներ է ստեղծում ինչպես դպրոցականի, նրա համայնքի, այնպես էլ երկրի տնտեսության, այդ թվում՝ ռազմարդյունաբերության զարգացման և արտագաղթի կրճատման համար: Այսօր ամբողջ աշխարհում տեխնոլոգիական ոլորտի մասնագետների մեծ պահանջարկ կա, որը կարող են լրացնեն մեր մասնագետներն առանց երկրի սահմաններից դուրս գալու և նույնիսկ տնային պայմաններում. առցանց:
Նորշենի «Արմաթ» ինժեներական լաբորատորիան թվով 9-րդն է Արցախում: Ինժեներական լաբորատորիաներ են գործում նաև Ստեփանակերտում, Շուշիում, Վանքում, Քարվաճառում, Բերձորում, Վուրգավանում, որտեղ սովորում են ավելի քան 150 դպրոցականներ, իսկ «Արմաթ» ցանցն ընդհանուր առմամբ ունի 220-ից ավելի լաբորատորիաներ, որն էլ միավորում է շուրջ 5000 դպրոցականների: ԻՏՁՄ-ն ծրագրում է «Արմաթ» ստեղծել Հայաստանի բոլոր դպրոցներում. այն դպրոցների աշակարտները, որտեղ դեռևս լաբորատորիա չկա և ովքեր ցանկանում են «Արմաթ»-ում սովորել կարող են անվճար հաճախել հարակից բնակավայրի «Արմաթ» լաբորատորիա: Անհրաժեշտ է փնտրել դպրոցը armath.am կայքում և կապ հաստատել խմբավարի կամ կազմակերպիչների հետ: