Հայտնի են «ԱրմՌոբոտիքս 2022» մրցույթի հաղթողները

Դեկտեմբերի 11-ին Դիլիջանի կենտրոնական դպրոցում տեղի ունեցավ «ԱրմՌոբոտիքս» հայաստանյան 14-րդ առաջնությունը, որն այս տարի կրում էր «Ինքնակառավարվող ռոբոտները՝ խելացի ագարակում» խորագիրը։ Մասնակցության հայտ ներկայացրած 130 թիմերից եզրափակիչ փուլում էին 39 թիմեր Հայաստանի (ներառյալ՝ Արցախը) «Արմաթ» ճարտարագիտական աշխատանոցներից, Գյումրու «Զարգացման լաբորատորիա» հիմնադրամից եւ Երեւանի ինֆորմատիկայի պետական քոլեջից։

Բուն միջոցառմանն ուղեկցեցին զուգահեռ իրականացվող ագրոտեխնոլոգիական ցուցահանդեսը, ինչպես նաեւ ՀԱԱՀ ռեկտոր Վարդան Ուռուտյանի եւ «Կարին» ավանդական երգի-պարի խմբի գեղարվեստական ղեկավար Գագիկ Գինոսյանի վարած աշխատարանները։

Կրտսեր տարիքի դպրոցահասակների (10-13տ.) մրցույթում`
- 1-ին տեղն զբաղեցրեց BeeMath խումբը (Բերդի թիվ 3 դպրոցի «Արմաթ» ճ/ա),
- 2-րդ տեղում էր «Այգուտ» խումբը (Այգուտի միջնակարգ դպրոցի «Արմաթ» ճ/ա),
- 3-րդ տեղում՝ GDL 1 խումբը (Գյումրու «Զարգացման լաբորատորիա» հիմնադրամ)։

Միջին տարիքի դպրոցահասակների (14-17տ.) մրցույթում`
- 1-ին տեղն զբաղեցրեց SmartFarmer խումբը (Երեւանի ինֆորմատիկայի պետքական քոլեջ),
- 2-րդ տեղում GDL 2 խումբն էր Գյումրու «Զարգացման լաբորատորիա» հիմնադրամից,
- 3-րդ տեղում՝ «Գանձակցիներ» խումբը՝ Գանձակի թիվ 1 դպրոցի «Արմաթ» ճ/ա-ից։

Մասնագիտացված թիմերից հաղթող ճանաչվեց Information technology in Talin խումբը՝ Թալինի ավագ դպրոցի «Արմաթ» ճ/ա-ից։ Մրցանակային տեղեր զբաղեցրած բոլոր խմբերը ստացան դրամական եւ
խրախուսական պարգեւներ։

Խրախուսական մրցանակներ ստացան նաեւ Scorpion-22 խումբը՝ Գյումրու «Դեպի Առաջ» երեխաների կենտրոնի «Արմաթ» ճ/ա-ից եւ ForFut խումբը՝ Գոշի միջնակարգ դպրոցի «Արմաթ» ճ/ա-ից։ Անհատական խրախուսական մրցանակ ստացավ նաեւ «Ֆիզմաթ» խմբի անդամ Գոռ Միրզոյանը։ Ժյուրիի կազմում ընդգրկված էին Symotec ընկերության տնօրեն Հրաչյա Խաչատրյանը, Վանաձորի տեխնոլոգիական կենտրոնի կրթական եւ ինժեներական ծրագրերի համակարգող, «Արմաթ» կրթական ծրագրի Լոռու մարզային համակարգող Եղիշե Սաֆարյանը, Հայաստանի ազգային ագրարային համալսարանի Գյուղատնտեսության մեքենայացման եւ ավտոմատացման գիտահետազոտական ինստիտուտի գիտական բաժնի վարիչ Արթուր Ալթունյանը, Ակբա բանկի հասարակայնության հետ կապերի թիմի ղեկավար Նարեկ Ասատրյանը, Intelinair ընկերության ինժեներական գծով ավագ տնօրեն Արմեն Խաչիկյանը։

Կազմակերպիչ՝ Առաջատար տեխնոլոգիաների ձեռնարկությունների միություն (ԱՏՁՄ)։ Գլխավոր հովանավոր՝ ՀՀ ԿԳՄՍ նախարարություն։ Հովանավոր՝ Ակբա բանկ։ Գործընկերներ՝ ԶիգԶագ, Հայաստանի ազգային ագրարային համալսարան, Դիլիջանի կենտրոնական դպրոց։